من القصايد اللى عجبانى اوى قصيده أسمها مش باقى منى صاغها بحرفيه جمال بخيت و طلع حته قصيده بتوصف حال مصر فى فتره قريبه اوى و استخدمها ببراعه خالد يوسف فى فيلمه دكان شحاته و أخد أجزاء منها تتناسب مع مجرى الفيلم و غناها بروعه أحمد سعد اسيبكم مع القصيده الاصليه لجمال بخيت
مش باقي منى غير شوية ضى في عنيا
انا حدهملك وامشي بصبري في الملكوت
يمكن في نورهم تلمحي خطوة تفرق معاكى بين الحياة والموت
مش باقي منى غير شوية نبض في عروقي خدي وعيشي
وافتح لي تابوت افرح بريحه ورد فرعوني وربنا في عوني
إذا دخلت الجنة ولا النار حشتاق لضحكتك وقعدتى في الدار
والقهوة متحوجه من طيبة العطار
في كل يوم الصبح اشرب حليب قبطي
وفى النهار والمسا امسك ستار الكعبة لو سبتي
واثبت اذا هربتى
اهديكى عمري وحسي وجوارحي
اهديكى جرحى هو إلى باقي في دنيتي لما خلص فرحى
مش باقي منى غير شوية لحم في كتافى
بلاش يتبعثروا في البحر
بلاش يتحرقوا في قطر الصعيد في العيد
بلاش لكلب الصيد تنوليهم
خدي إلى باقي من الأمل فيهم
وابنيلى من عظمهم في كل حارة مقام
وزورينى مرة وحيده لو كل ألفين عام
إلم الجراح يتلم
مش باقي منى غير شوية دم
متلوثين بالهم مرين وفيهم سم
كانوا زمان شربات والنكتة سكرهم
شربتهم الخفافيش في إلب أوكرهم
مش باقي منى غير شوية دم مقدرش اسقيكى مواجعهم
ويرضوا مقدرش ارميكى وأبعهم
يمكن في مرة تعوز تطلبيني شهيد
حاحتاج يميها الدم يمضى على شهدتى
مش باقي منى غير شوية قوة في إرادتي
على شوية شعر من خطى
حسبي عليهم وأنتى بتخطي
وأنتى في صبح الدلال بتعطري شطي
مش باقي غير شوية ضى في عنيا
انا مش عاوزهم
لو كنت يوم حالمحك وأنت بتوطى
في معركة مفيهاش ولا طيارات ولا جيش
وأنت في طابور العيش
بتبوسى أيد الزمن ينولك لقمة من حقك المشروع
مش باقي منى غير شهقة
شهقة في نفس مقطوع
بفتح لها سكة ما بين رئة وضلوع
ما بين غبار ودموع
وأنا تحت حجر المقطم في الدويئة بموت
أنا والعطش والجوع
يئن تحتي التراب
وأنا صوتي مش مسموع
يا حلمنا الموجوع من المرور ممنوع
مستني لما يمر موكب سلاطينك
مش باقي منى غير شوية رحمة من طينك
على شوية صبر من دينك
مش باقي منى غير حبة غنا تايهين
في الضلمة مش لاقين حس الفواعلية
ولا صوت مركبي عفي فوق المعدية
ولا صوت بناتي العذارى في كل صبحيه
والغنوه أمنية يما نفسي أقابل حبيبي
وأنا على الزراعية صوتك وصوتهم غاب
وأنا تحت حجر المقطم بموت لوحدية
الليلة راحت عيوني تطل على البستان
وجناين الرمان رجعت لي توصف عناد الغل والدخان
وسحابة سوده تضلل على الغنا الغلبان
رجعت لي توصف هبوب الموت على الألوان
رجعت لي توصف خيال الذل في موائد الرحمن
مش باقي منى غير شوية كفر بشروقك
وأنا منبع الإيمان
مش باقي منى غير شوية ضى
وعنيا مش قادرة تلمحنى
في وحدتي محنى
خايف أموت من الخوف والضعف يفضحني
السجن عشش في قلبي وماشى في شوارعك
نفس إلى بعني وخدعني بالرخيص بيعك
أشيل حمولى أنا ولا أشيل حملك
ماعدت املك شيء فيكى ولا فيا
ولا قيراط ولا بيت
ولا نسمة صافية تلاغى النيل بحريه
مش باقي منى غير شوية حب جرحني
ولا باقي منى غير شوية ضى في عنيا
و ده اللينك بتاع القصيده بألقاء جمال بخيت
http://www.youtube.com/watch?v=SJzCEXmMNmY
ليست هناك تعليقات:
إرسال تعليق