بنات :
قبة سيدنا الوالي دي نوروها
محلا البيارق و الناس بيزوروها
قبة سيدنا الوالي في الجو عالية
محلا البيارق لما دوروها
بائع :
حمص حمص تل ماينقص
ع النار يرقص يرقص و يقول
اللي شاف حمص و الا كلشي
حب و اتلوع و لا طالشي
فتاه
يسترك هات حبة بقرش
الجميع :
ها ها ها ها ها ها
البائع :
فريره للعيل يا بو العيال ميل خدلك سبع فرارير
بائع اخر :
زماره شخليله عصفوره يا حليله طراطير ياواد طراطير
الجميع :
طراطير طراطير طراطير
شحات :
يا مسلمين يا مؤمنين لله
ده كل مين يفعل جميل يلقاه
بركه ولى له فى الشفاعه جاه
لله لله لله
المعلم :
الليله الليله السيرك تعالوا فرجه تساوى جنيه قولوا هيه
بمناسبه المولد يوجد برنامج سواريه
قولوا هيه قولوا هيه
في السيرك شجيع يهجم ع السبع
ويركب دوغري عليه قولوا هيه
وبنات قمرات زي الشربات
حلوين مش عارف ليه قولوا هيه
الجميع :
الله حى الله حى
المنشد :
شفت ف منام صاحب المقام ده ابهه
الجميع :
الله حى الله حى
المنشد :
ويمامه حايمه عليه تسبح ربها
الجميع :
الله حى الله حى
المنشد :
ميلت فوق ايده و جيت احبها
الجميع :
الله حى الله حى
المنشد :
صحونى من النوم خدت بعضى و تنى جى
الجميع :
الله حى الله حى
لاعب البخت :
فتح عينك تاكل ملبن
فينك فينك تاكل ملبن
إوع لجيبك لا العيب عيبك
قرب جرب تاكل ملبن
نشن وسطن إيدك و سطن
إضـــــــــرب
البندقيه :
طاخ
اللاعب :
يحميك يا بني تبقى غالبني
قرب خدلك حتة ملبن
نداءات :
طعميه . اراجوز .عجميه باللوز
الجميع :
الليلة الكبيرة يا عمي و العالم كتيرة
ماليين الشوادر يابا م الريف و البنادر
دول فلاحين و دول صعايدة
دول من القنال و دول رشايدة
الليلة الكبيرة يا عمي و العالم كتيرة
عجوز :
إسعى إسعى إسعى إسعى
المصوراتى :
خدلك صورة ستة في تسعة
عجوز :
إسعى إسعى إسعى إسعى
قهوجى :
ياسي عجورة النار خسعة
فلاح :
ناس من بلدنا هناك أهم
روح يا براهيم انده لهم
(يتعانقون )
سلامات سلامات سلامات
على البلديات
فلاح :
دى الحضره و الذكر انجلى
يالا بنا نذكر يا ولا
داخل السيرك
المدرب :
أنا شجيع السيما أبو شنب بريمة
أول ما أقول عالي هوب و أصرخ لي صرخة
السبع يتكهرب
و يبقى فرخة
حالاً بالاً سأصارع
أسد إنما إيه متوحش
وح خلي وجهه شوارع
تسقيفة يا ناس مايصحش
أهو جه أهو جه تسقيفة بقا
تسقيفة أمال
تشجيعة أمال
تعالالي الالي اللالي يا حبيبي تعالالي
بائع :
السمك مقلي كل و برقلي صنف زي الفل
بائع :
استخار و إختار فشة أو ممبار
يالا سمي و كل
زفه المطاهر
النساء :
يام المطاهر رشى الملح سبع مرات
فى مقامه الطاهر خشي
و قيدي سبع شمعات
أطفال :
يا عريس يا صغير
علقة تفوت و لا حد يموت
لابس و مغير
و هتشرب مرقة كتكوت
فى القهوه :
المعلم :
بالزمة دة سابع عيل
مزفوف من وقت قليل
القهوجى :
مولد شالله يا معلم
عقبال أولادك
المعلم :
كلم
نداءات :
واحد مظبوط و إتنين مصري
القهوجى :
ع النار حاضر جايلك دوغري
(يوزع التحيات على الزبائن منشدا )
مسا التماسي مسا التماسي
ياورد قاعد على الكراسي
نداء :
هات شاي يا دقدق
القهوجى :
عيني و راسي
يدخل الريس حنتيره مغنى القهوه الصعيدى
الجميع :
سمعنا يا ريس حنتيرة
للصبح معاك السهيرة
سمعنا سمعنا
المغنى :
يا غزال يا غزال
ده العشق حلال
دوبتني دوب
خلتني خيال
يا شفتك فص فراولة
و أنا لا قوة و لا حول
شقلبتلى عقلى على اولة
أه يا غزال
يارب يا عالم بالحال
تهدي حبيبي و يصبح عال
و أغني و أرفع بالموال
و أقول يا غزال
المعلم :
وقف ياريس حنتيرة
في ناس هنا قاعدة كتيرة
ولا حد قال هات تعميرة و
لا واحد شاي
اللي ح يطلب راح يقعد
و اللي ما يطلبشى يبعد
زبون :
يالابنا نخرج يا مسعد
شارع التورماي
الاخر :
إوعد يارب إوعد
أدي كمان قهوة
الاول :
يالابنا يا مسعد ندخل على سهوة
فى القهوه الثانيه
الغازيه :
طار في الهوا شاشي و
إنت ما تدراشي
طرفه شاورلي شاورلي عليك
حكم الهوا ماشي
هوا العصاري ياواد
على سطح دارى يا واد
خدني و رماني عليك و لا إنت داري
أهين يا ناري منك يا جاري
خدني ورماني رماني عليك هوا العصاري
صاحب القهوه :
اللي هيطلب راح يقعد
و اللي مايطلبش يبعد
الزبون :
يالابنا نخرج يا مسعد
شارع التورماي
لعبه زق الطاره
صاحب اللعبه :
ورينا القوة يا بني إنت وهو
مين عنده مروه و عاملي فتوة
يقدر بقدارة على زق الطارة و يفرقع بمبة
شاب :
وسع وسع وسع وسع
أنا أزق الطارة و أضرب ميت بمبة
دانا الاسطى عمارة من درب شكمبة
سيطي من القلعة لسويقة
أنا واخد السمعة
الجميع :
طب يالله تعالى
الشاب :
لا ياعم سعيدة دي البدلة جديدة
الجميع :
هأأأه سعيدة يابو بدلة جديدة
سيده :
ياولاد الحلال بنت تايهة طول كدة
رجلها الشمال فيها خلخال
زي دة
رجل :
زحمة يا ولداه
كام عيل تاه؟؟
الجميع :
الليلة الكبيرة يا عمي و العالم كتيرة
ماليين الشوادر يابا في الريف و البنادر
السيده :
ياولاد الحلال
ستار
ليست هناك تعليقات:
إرسال تعليق