و انا بقلب فى الشرايط القديمه اللى عندى لقيت الاغنيه الرائعه دى و هى كلمات صلاح جاهين و الحان و توزيع هانى شنوده و غناء ايمان يونس من فرقه المصريين ( للى فاكر الفرقه دى )
الشوارع حواديت
حوداية الحب فيها و حوداية عفاريت
إسمعى يا حلوة لما أضحكك
الشارع دة كنا ساكنين فيه زمان
كل يوم يضيق زيادة عما كان
أصبح الآن بعد ما كبرنا عليه
زى بطن الأم مالناش فيه مكان
الشوارع حواديت
حوداية الحب فيها و حوداية عفاريت
إسمعى يا حلوة لما أضحكك
الشارع دة رحنا فيه المدرسة
اللى باقى منه باقى
و اللى مش باقى إتنسى
كنسوه الكناسين بالمكنسة
و بدموع لحظة أسى أنا برضه كمان نسيت
الشوارع حواديت
حوداية الحب فيها و حوداية عفاريت
إسمعى يا حلوة لما أضحكك
الشارع دة أوله بساتين و آخره حيطة سد
ليا فيه قصة غرام ماحكيتش عنها لأى حد
من طرف واحد
و كنت سعيد أوى
بس حراس الشوارع حطوا للحدوتة حد
الشوارع حواديت
حوداية الحب فيها و حوداية عفاريت
إسمعى يا حلوة لما أضحكك
و الشارع دة شفتك إنتى ماشية فيه
لابسة جوب و بلوزة وردى
و عاملة ديل حصان وجيه
إتجاهك إتجاهى مشينا ليه
و الشارع دة زحام و تيه بس لازم نستميت
الشوارع حواديت
حوداية الحب فيها و حوداية عفاريت
و إضحكى يا حلوة لما أسمعك
ليست هناك تعليقات:
إرسال تعليق